для молитвы по самоубийце канон

КАНОН
Песнь 1
Ирмос: Во глубине посла иногда фараонинское всевоинство преоруженная сила;
воплощшеся же слово потребило есть: препрославленный Господь, славно бо
прославися.
Упокой Господи душу раба Твоего
Всемилостивый Господи, помилуй мя по милости Твоей, пети Тебе начинающа и
молитися о убившемся дерзко, да не в суд ми сие будет, ни в осуждение, Судие
Праведнейший.
Упокой Господи душу раба Твоего
Да не будет молитва моя во грех, яко кроткий Давид глаголет: неже во отягощение
души самовольней смерти предавшемуся; но мученик мольбами оставление
прегрешений наших даруй нам.
Слава Отцу и Сыну и Святому Духу
Богатую милость присно всем источая, Всеблагий Христе Боже, и ныне рабу
Твоему (имя рек), нами Тебе молящемуся, помилование даруй и с
представльшимися во благочестии причти, аще и нечестиво скончался в
неразумии.
И ныне и присно и во веки веков. Аминь.
Утвердивши колеблемый ум мой, Мати Божия укрепи мя божественными
повеленьми Родшагося из Твоего освященного чрева и упразднившаго
Владычице, адово мрачное царство, со дерзновением неосужденно молитися об
усопшем (имя рек).
Песнь 3
Ирмос: На камени мя веры утвердив, расширил еси уста моя на враги моя:
возвесели бо ся дух мой, внегда пети: несть свят, якоже Бог наш, и несть
праведен паче Тебе, Господи.
Упокой Господи душу раба Твоего…
Твоея красоты сиянием озаритися усопшему благоволи, в вере с почившему
благоволи, в вере с почившими, богатый в милости; Ты бо еси Бог наш Единый
безгрешный и многомилостивый.
Упокой Господи душу раба Твоего…
На месте прохлаждения в вечнем покоище сподоби прияти и раба Твоего,
малодушием жизнь свою пресекшаго: Ты бо еси Един Сильный и немощи наши на
Ся восприявый, Господи Боже Наш.
Слава Отцу и Сыну и Святому Духу…
В чертозе небеснем водвориться, Владыко, приими раба Твоего (имя рек), да не
услышит он праведного Твоего гласа: «Не вем тя», аще и воистину повинен есть
сему.
И ныне и присно и во веки веков. Аминь.
Умерщвленных нас воздвигла еси, Богородице, жизни нетленней Жизнодавца
рождши; и раба Твоего (имя рек) возведи из ада преисподнейшаго, Сына Твоего о
милости умоляющи.
Песнь 4
Ирмос: Пою Тя, слухом бо, Господи, услышахом и ужасохомся: до мене бо идеши
мене ища заблудшаго. Тем многое Твое снисхождение, еже на мя, прославляю,
Многомилостиве.
Упокой Господи душу раба Твоего
Во уповании на Тя, Боже, изнемогшему, и насилием вражиим одоленного, раба
Твоего пощади, Спасе, презирая, яко Благ, прегрешения его вольная и невольная.
Упокой Господи душу раба Твоего
Милосердия имый неизледимую бездну, Господи, бездну греховную раба Твоего
покрый, Человеколюбче, омыв Кровию Свею грех неведения и маловерия его.
Слава Отцу и Сыну и Святому Духу
Живыми господствуя и мертвыми владычествуяй помилуй и раба Твоего
(имя рек), власть бо имаши всякую на небесии на земли, Христе Боже, Отцу
соседый и Духом вся очищаяй.
И ныне и присно и во веки веков. Аминь.
Исцелила еси, Богородительнице, Евино поползновение окаянное; Зиждителя бо
родила еси, исправити могущего тварь погибающую: Того моли и сего раба
(имя рек) неключимого, заповедь Божию преступившего, спаси по единой
милости.
Песнь 5
Ирмос: Света подателю и веков Творче, Госаподи, во свете Твоих повелений
настави нас: разве бо Тебе иного Бога не знаем.
Упокой Господи душу раба Твоего
Умертвишася и во дно адово поползнувшагося возведи, Боже, преступление того
заглаждая; на Кресте бо грехи наша пришел еси омыти честною Кровию Своею,
Христе, Искупителю всяческих.
Упокой Господи душу раба Твоего
Спасти нас пришедый, Христе Боже, приими ныне и наша недостойная моления о
рабе Твоём (имя рек), да муки вечныя избавиши, помилован будет с ними,
Спасителю Преблагий.
Слава Отцу и Сыну и Святому Духу
Молим Ти, Слове Божий, аще и дерзновенно сие, прогнева бо Тя раб Твой (имя
рек), обаче благодатию Твоею умоляем, не возгнушася молитв наших и помилуй
нас, вкупе вси бо повинны есмы пред Тобою, Всесвятый Владыко.
И ныне и присно и во веки веков. Аминь.
Под кровом Твоим, Мати Божия, спасаются вси надеющиися на Тя: Твоим
заступлением защити и нас, и сподоби со дерзновением неосужденно молити
Сына Твоего живот свой скончавших безнадежно (имя рек).
Песнь 6
Ирмос: В бездне греховней валяяся, неизследную милосердия Твоего призываю
бездну: от тли, Боже, мя возведи.
Упокой Господи душу раба Твоего
Из земли создавый человека, Боже, и в землю ныне возвратишася, пощади,
Господи, в неразумии сокрушившаго скудельный сосуд свой: можеши бо, Владыко
Творче, и паки возставити его от истления.
Упокой Господи душу раба Твоего
Неизреченный и непостижимый, Господи, щедротами несказаннаго
Человеколюбия Твоего помилуй живот свой скончавшаго, презирая согрешения о
иже в ведении и неведении содеянная.
Слава Отцу и Сыну и Святому Духу
Озаритися милостию Твоею сподоби, Владыко, вольне оставльшаго (имя рек)
житие свое и к свету возведи, из тьмы несветимыя изымая милосердия ради.
И ныне и присно и во веки веков. Аминь.
Избавительнице усердно призывающим Ти, Пречистая Владычице, Сына Твоего
умоли скончавшагося (имя рек) ущедрити: живота и смерти Владыку родила еси.
Песнь 7
Ирмос: Богопротивное веление беззаконнующаго Мучителя, высок пламень
вознесло есть: Христос же простре благочестивым отроком росу духовную;
Сый благословен, и препрославлен.
Упокой Господи душу раба Твоего
Во ад с душею, яко Бог, сошедый, и в рай разбойника с Собою введши, помяни и
ныне раба Твоего (имя рек), преступлением многим Ти прогневавша, ныне же
Тебе нами молящася бедне.
Упокой Господи душу раба Твоего
Един безгрешный, в мертвых волею вменился еси, да умерщвленных силою
человекоубийцы воскресивши с Собою, от державы того исхити и раба Твоего,
Всесильне.
Слава Отцу и Сыну и Святому Духу
Радость присносущную даровати нам Воскресением Своим изволивый, от
мрачнаго горькаго царства изми раба Твоего (имя рек), да от муки вечныя
свободившися, узрит себе одесную Тебе, Судие Многомилостивый.
И ныне и присно и во веки веков. Аминь.
Сияние славы Отчей, плотию от Тебе явившагося умоли, Пресвятая, из адовы
мглы свободити непотребнаго раба Твоего (имя рек), той бо яко Матерь, Тебе
нами просит.
Песнь 8
Ирмос: Пещь иногда огненная в Вавилоне действа разделяше, Божиим велением
халдеи опаляющая, верныя же орошающая, поющия: Благословите, вся дела
Господня, Господа.
Упокой Господи душу раба Твоего
Смертное царство Своею смертию разоривый, Божественною же силою вход в
вечный живот отверзый, не затвори благоутробия Твоего и рабу Твоему, аще и
прегрешившему, обаче из ада ныне горце взывающа.
Упокой Господи душу раба Твоего
Красоты Твоея насладитися сподоби, студ греха безобразнаго очищая умершаго
смертию поносной: Един бо еси, Владыко, грех свободен, крестною смертию за
нас умертвился есй.
Слава Отцу и Сыну и Святому Духу
Исправити хотя падших в персть смертную, Сам смерти причастен явился еси,
Безсмертный, от смертных удолий силою Твоею возведи раба Твоего (имя рек),
лютою смертию поползнувшагося.
И ныне и присно и во веки веков. Аминь.
Велия воистину есть Рождества Твоего тайна, Богомати: Бога воплотившагося
родила еси; Егоже моли, яко Сына Твоего, спасти бедне скончавшагося (имя рек):
имаши бо дерзновение к Рождшемуся от Тебе Благоутробному Спасу мира.
Песнь 9
Ирмос: Прежде солнца Светильника Бога возсиявшаго, плотски к ним
пришедшаго, из боку девичу неизречено воплотившая, Благословенная
Всечистая, Тя, Богородице, величаем.
Упокой Господи душу раба Твоего…
Имеяй власть живых и мертвых, пощади, Спасе, раба Твоего (имя рек), смертию
горькою скончавшагося: Тебе бо от Отца Твоего дадеся живити и миловати, ихже
хощеши, Сыне Божий.
Упокой Господи душу раба Твоего…
Преславное множество святых Твоих, Христе, непрестанно молит Тя за грешныя
рабы Твоя, да помилуеши ихже волиши милосердием Твоим и геенны вечныя
избавиши.
Слава Отцу и Сыну и Святому Духу…
Благости воистину пучина неизследимая, благодатию Твоею помилуй
прогневавшаго Ти раба Твоего (имя рек), и нас молящихся.
И ныне и присно и во веки веков. Аминь.
Достойно Ти, Богородице, ублажающе, к Тебе, яко Матери нашей, притекаем
надежно; сами себе и брата нашего (имя рек), малодушне скончавшагося, Тебе
Заступнице, и с Тобою Христу Богу предаем смиренно.
Молитва о самоубийце
Взыщи Господи погибшую душу (здесь говориться имя), и аще возможно есть
помилуй ю. Неизследимы пути Твои. Не постави мою молитву во грех но да
будет Твоя Святая воля. Аминь.