Канон ко Господу Иисусу Христу на разлучение души от тела

КАНОН КО ГОСПОДУ ИИСУСУ ХРИСТУ НА РАЗЛУЧЕНИЕ ДУШИ ОТ ТЕЛА, ВНЕГДА
ЧЕЛОВЕК ХОЧЕТ ПРЕСТАВИТИСЯ, НО ГОСПОДЬ ЕГО НЕ ОТПУЩАЕТ
(в девяти песнях)
Песнь 1
Ирмос: Яко по суху пешешествовав Израиль, по бездне стопами, гонителя фараона видя
потопляема, Богу победную песнь поим, вопияше.
Припев: Милостивый Господи, отпусти душу смиреннаго раба Твоего (рабы Твоея, рабов
Твоих) (имярек).
Душевные и телесные болезни обыдоша мя и молю Бога о преставлении, но не
отпущает грешную мою душу Господь, ожидая покаяния всецелаго.
Припев: Милостивый Господи, отпусти душу смиреннаго раба Твоего (имярек).
Все мои други пребывают в обителях Небесных, един аз, несчастный, влачу тяжкое
бремя земнаго жития и умрети не могу.
Слава Отцу и Сыну и Святому Духу: Потоки слез источаю, но не отворяет Святая
Троица двери в Небо, затворенные грехами моими, и не забирает мя, страждущего, из
страны чуждей.
И ныне и присно и во веки веков, аминь: Пречистая и преблагословенная Мати Божия,
смилостивись над окаянным рабом Твоим, приклони милость Сына Твоего и Бога нашего,
да снизойдет ко мне, грешному, очистит душу мою и примет в Дом Свой.
Песнь 2
Ирмос: Вонми, небо, и возглаголю, и воспою Христа, от Девы плотию пришедшаго.
Припев: Милостивый Господи, отпусти душу смиреннаго раба Твоего (имярек).
На реках Вавилонских сижу и плачу, поминая красоту селений Твоих, Господи, но
далече от мене дворы Иерусалимские и не приходит кончина, о коей молюся.
Припев: Милостивый Господи, отпусти душу смиреннаго раба Твоего (имярек).
Тело мое возсмердело и согнило от тлена Вавилонскаго, и жажду отрешитися от
него до дня Всеобщего Воскресения, но страстная душа моя держится за плоть, яко
утопающий за древо, и страшится погрузитися в пучину грехов своих нераскаянных.
Слава: Призри на мои мучения, Отче и Сыне и Душе Святый, помилуй мою
терзаемую идолослужителями душу, благослови на переход в мир духа и света!
И ныне: В пленении вражии, в тесноте и скорби обретаюся аз на Земли, и нет мне
спасения от сынов чуждих, связующих душу мою путами многими, Ты же, Чистая, умоли
Сына Твоего, да оставит мне грехи вся и на Небо возведет.
Песнь 3
Ирмос: Несть свят, якоже Ты, Господи Боже мой, вознесый рог верных Твоих, Блаже, и
утвердивый нас на камени исповедания Твоего.
Припев: Милостивый Господи, отпусти душу смиреннаго раба Твоего (имярек).
Вем, яко мытарства ужасные предстоят мне в час кончины, испытания воли и
совести грядут ко мне, обаче молю Бога разрешити мя от бремени сего тела, яко стражду
зело.
Припев: Милостивый Господи, отпусти душу смиреннаго раба Твоего (имярек).
Множество бесов злобных обрящут бедную мою душу, внегда отлучится от тела, и
повлекут ю с заушением и плеванием, куда не восхочет; Ты же, Господи, посли ангела
свята, дабы преградил им путь, и избави душу мою от мучений геенских.
Слава: Нелицеприятен Суд Твой, Боже, и боюся осуждения вечнаго, но продолжаю
прилагать грехи ко грехам; верую, яко Ты един можеши разорвать замкнувшуюся цепь и
воздвигнуть мя, падшего, и восхитить от земли.
И ныне: Богородице Дево, Неневестная Невесто, славных ангелов славнейшая, Ты
видиши печаль, яже обдержит мя, зриши горе мое; не отвержи мене от любви Твоея,
прииди скоро и изми мя из бушующего моря земнаго жития.
Песнь 4
Ирмос: Христос моя сила, Бог и Господь, честная Церковь боголепно поет, взывающи от
смысла чиста, о Господе празднующи.
Припев: Милостивый Господи, отпусти душу смиреннаго раба Твоего (имярек).
Душа моя ко аду приблизилась, и кто свободит мя от оков мира суетнаго? Кто
дарует избавление всецелое? Прииди, Господи, и спаси мя от бессмысленного течения
дней моих!
Припев: Милостивый Господи, отпусти душу смиреннаго раба Твоего (имярек).
Растворяется жизнь моя в потоце времени, исчезает, яко паутина на ветру. Не
остави мя, Боже мой, призри на мя, яко настало время ущедрити раба Твоего, пришло
время, Господи!
Слава: Прильпе земли утроба моя, скорби и напасти окружиша мя, и не вижу
избавляющего. Востани, Господи, вскую спиши, возгласи гласом отчим, призови блуднаго
Твоего сына в Дом Свой.
И ныне: «Смилостивись надо мною, честнейшая Богоневесто, видя мое углебание в
страстях, – сердце мое нераскаянное вопиет. – Смилостивись, и не отрини до конца, и
введи раба Твоего в Дом Христов».
Песнь 5
Ирмос: Божиим светом Твоим, Блаже, утренюющих Ти души любовию озари, молюся: Тя
ведети, Слове Божий, Истиннаго Бога, от мрака греховнаго взывающа.
Припев: Милостивый Господи, отпусти душу смиреннаго раба Твоего (имярек).
Вижу братьев моих во гробах, мирных и благообразных, и завистию распаляюся:
почто не мое тело возлежит во гробе? Почто не забирает мене Христос с каторги
земной?
Припев: Милостивый Господи, отпусти душу смиреннаго раба Твоего (имярек).
Над могилами хожду Богомыслия ради и рыдаю горько: се лежит прах христиан
усопших, дух коих многие лета радуется в селениях праведных; моему же смрадному
телу нет упокоения.
Слава: Стенаю, яко Иов на гноище, и нет боле у души сил носить на себе тело
мертвое, двигать мертвыми членами. Троице Святая, помилуй мя и спаси от сего дела
лютаго!
И ныне: На Тебя уповаю и надеюся, Матерь Бога и всех христиан, заступись за мя,
Утешительница скорая, да сподобит Сын Твой слугу Своего разрешиться с миром.
Песнь 6
Ирмос: Житейское море, воздвизаемое зря напастей бурею, к тихому пристанищу Твоему
притек, вопию Ти: возведи от тли живот мой, Многомилостиве.
Припев: Милостивый Господи, отпусти душу смиреннаго раба Твоего (имярек).
Плоть мою снел червь гордыни, плесень себялюбия покрыла кожу мою, гной
превозношения отравляет чрево мое, зловоние греховное исходит от мене, и во всем
стал подобен мертвецу аз, но не умирает тело разложившееся и пленяет душу
безблагодатную.
Припев: Милостивый Господи, отпусти душу смиреннаго раба Твоего (имярек).
Духовный мертвец аз есмь, и не найдется мне места в трапéзе, яко недостоин аз
приобщения крови и плоти Христовых; стою́ в притворе подле гробов и проклинаю
сердце свое несмиренномудрое.
Слава: Страстями нечистыми осквернил храм тела своего аз, Господи, и не могу
внити в храм Твой, не дерзаю нести в место святое мясо мертвое; Ты же, Милосердый,
помилуй мя, очисти от мертвечины и водою Духа Святаго оживи.
И ныне: Пресвятая и пренепорочная Богородице, Заступница христиан велия, не
прогневайся на раба Своего, снизойди к моему прошению, яко единая можеши сотворити
да воскресну душею и телом и вниду в Дом Божий со обетными дарми.
Песнь 7
Ирмос: Росодательну убо пещь содела Ангел преподобным отроком, халдеи же опаляющее
веление Божие, мучителя увеща вопити: благословен еси, Боже отец наших.
Припев: Милостивый Господи, отпусти душу смиреннаго раба Твоего (имярек).
Согрешившие члены мои наказание приемлют сообразно грехам их: слезятся глаза
мои, бесстудно взиравшие на красоты плотские, немеет язык, глаголавший осуждение,
дрожат руки, прикасавшиеся к телам блудным, болеют ноги, носившие господина своего
в места непотребные, и страдание обдержи́т мя, яко пелены погребальные.
Припев: Милостивый Господи, отпусти душу смиреннаго раба Твоего (имярек).
Враги мои прямо мне приблизишася и сташа, и глумятся духи темные над рабом
гордыни, и смертельные раны срамной душе моей наносят; аз же не могу противостати
им и безропотно созерцаю погибель свою.
Слава: Господи Иисусе Христе, Боже мой, явися ми на месте озлобления моего,
попали духов злых, возведи мене на рамена Свои, яко овцу пропащую, и введи в
овчарню Свою Небесную, где раб Твой чает найти упокоение.
И ныне: Первейшая и славнейшая среди жен земнородных, Богородительнице
Марие, даруй ми исцеление от страстей моих и соделай мя агнцем непорочным,
могущим приняти спасение Христово.
Песнь 8
Ирмос: Из пламене преподобным росу источил еси, и праведнаго жертву водою попалил еси:
вся бо твориши, Христе, токмо еже хотети, Тя превозносим во вся веки.
Припев: Милостивый Господи, отпусти душу смиреннаго раба Твоего (имярек).
Истаивает в суете дух мой, исчезает во истлении душа моя; вожделенная же смерть
моя далече от мене, и не призывает мя Господь на Суд Свой, коего жажду.
Припев: Милостивый Господи, отпусти душу смиреннаго раба Твоего (имярек).
Нет мне места посреди сынов земных, нет мне места и в мире горнем; алкаю
служения, но служити Богу не могу, сатану же ежечасно ублажаю.
Слава: Дни скорби моей кто исчислит? Кончину желанную кто предречет? Окрыли мя,
Господи, надеждою, открой мне святую волю Твою и будущее возвести!
И ныне: Яко прокаженный хожду аз по Земле, и сторонится мя всяка тварь, видя мое
падение всесовершенное. Токмо на Твою помощь надеюся, Целительница души моей,
наложи пластырь любви Твоей на струпья моя греховныя и в Небесный Чертог мя взяти
Сына Своего умоли.
Песнь 9
Ирмос: Бога человеком невозможно видети, на Негоже не смеют чини Ангельстии взирати:
Тобою же, Всечистая, явися человеком Слово Воплощенно, Егоже величающе, с Небесными вои
Тя ублажаем.
Припев: Милостивый Господи, отпусти душу смиреннаго раба Твоего (имярек).
Вижу красоту Твою, Господи, вижу и уродство свое, вем, яко подобное прилепляется
к подобному, аз же непреподобен Тебе. Обаче, поминая щедроты Твоя, Боже, упованием
исполняюся, ибо верую, яко можеши спасти последнего из сынов Твоих погибших.
Припев: Милостивый Господи, отпусти душу смиреннаго раба Твоего (имярек).
Вспоминаю Дом Твой преизобильный, Отче, но не могу выйти из хлева смраднаго,
мечтаю о трапезе веселия, но продолжаю вкушать рожки со свиньями, грежу о лоне
Авраамле, но ложе мое труд и болезнь. Ты же, яко отец любящий, простри милующую
десницу Твою и сотвори мя причастником славы Твоея.
Слава: Пресвятая и Всесвятая Троице, смилуйся над грешным рабом Твоим, изми
душу мою из мира падшего и всели мя, недостойнаго, в обители райские.
И ныне: Всеблаженная и Всесовершенная Матерь Света, не остави мя на погибель
адскую, на мучения вечные и страдания неизбываемые, заступись Своим
предстательством пред Рожденным из ложесн Твоих, да послет рабу Своему (имярек),
болящему душею и телом, скорую кончину и сподобит сего приняти смерть в покаянии и
мире! Аминь.
Молитва
Господи Иисусе Христе, Спасителю наш и Избавителю от работы вражии! В деснице
Твоей жизнь наша и смерть наша, во власти Твоей вхождение и исхождение из мира
сынов Твоих. Знаем, яко волиши, якоже хощеши, но ведаем, яко и на молитву раб Твоих
призираеши. Молимтися, дабы по молению нашему сократил Ты, Милостиве, срок
страданий наших земных, яже положил нам по правде Твоея. Помяни рабов Твоих сих
(имярек) и изми их в преполовении дней из мира скорбнаго, да не будут мучитися до
глубокой старости. Укрепи нас на духовную брань в час кончины нашея, да возможем
бесстрашно и радостно изыти из страны чуждей, и прими в обители Свои, Духом Святым
осеняемые и Отцем благословенные, идеже вечно будем петь хвалу Тебе, Живодавче, и
славить Пресвятую Троицу непрестанно, ныне и присно и во веки веков! Аминь.
Д. Савельев, Е. Кочергина