Канон утешительный преподобномученику Ефрему Новому

Канон утешительный
преподобномученику Ефрему Новому,
Неамакринскому чудотворцу
творение Герасима монаха Микрагианнанита
Иерей: Благословен Бог наш:
Чтец: Аминь. Царю Небесный: Трисвятое по Отче наш:
Иерей: Яко Твое есть Царство:
Чтец: Аминь. Господи, помилуй (12 раз).
Приидите, поклонимся Цареви нашему Богу.
Приидите, поклонимся и припадем Христу, Цареви нашему Богу.
Приидите, поклонимся и припадем Самому Христу, Цареви и Богу
нашему.
Псалом 142:
Господи, услыши молитву мою, внуши моление мое во истине Твоей,
услыши мя в правде Твоей:
И не вниди в суд с рабом Твоим, яко не оправдится пред Тобою всяк
живый.
Яко погна враг душу мою, смирил есть в землю живот мой, посадил мя
есть в темных, яко мертвыя века.
И уны во мне дух мой, во мне смятеся сердце мое.
Помянух дни древния, поучихся во всех делех Твоих, в творениих руку
Твоею поучахся.
Воздех к Тебе руце мои, душа моя, яко земля безводная Тебе.
Скоро услыши мя, Господи, исчезе дух мой: не отврати лица Твоего от
мене, и уподоблюся низходящим в ров.
Слышану сотвори мне заутра милость Твою, яко на Тя уповах.
Скажи мне, Господи, путь воньже пойду, яко к Тебе взях душу мою.
Изми мя от враг моих, Господи, к Тебе прибегох.
Научи мя творити волю Твою, яко Ты еси Бог мой. Дух Твой Благий
наставит мя на землю праву.
Имене Твоего ради, Господи, живиши мя, правдою Твоею изведеши от
печали душу мою.
И милостию Твоею потребиши враги моя и погубиши вся стужающия
души моей, яко аз раб Твой есмь.
Слава, и ныне: Аллилуиа (трижды).
Иерей: Мирная ектения. Яко подобает:
Абие глас 4: Бог Господь, и явися нам, благословен грядый во имя
Господне.
Стих 1: Исповедайтеся Господеви, яко благ, яко в век милость Его.
Стих 2: Обышедше обыдоша мя, и именем Господним противляхся им.
Стих 3: Не умру, но жив буду и повем дела Господня.
Стих 4: Камень, егоже небрегоша зиждущии, сей бысть во главу угла: от
Господа бысть сей, и есть дивен во очесех наших.
Тропарь, глас 4:
Чтущим святую память твою/ и просящим теплаго предстательства,/
подавай всегда крепкое заступление,/ избавляя искушений же и бед,/ и всяких
скорбей, и лютых болезней,/ преподобномучениче святе Ефреме,/ яко Спаса
служитель теплейший.
Слава:
Обретением честных твоих мощей,/ радости исполнил еси верных
сердца,/ паче же обитель твою возвеселил еси,/ яже, прибегающи к благодати
твоей, вопиет:/ ты – мое прибежище и теплый заступник,/ преподобномучениче
Ефреме./ Темже и нас избави лютых обстояний.
И ныне:
Не умолчим никогда, Богородице,/ силы Твоя глаголати, недостойнии:/
аще бо Ты не бы предстояла молящи,/ кто бы нас избавил от толиких бед,/ кто
же бы сохранил до ныне свободны;/ Не отступим, Владычице, от Тебе,/ Твоя бо
рабы спасаеши присно от всяких лютых.
Псалом 50:
Помилуй мя, Боже, по велицей милости Твоей и по множеству щедрот
Твоих очисти беззаконие мое.
Наипаче омый мя от беззакония моего, и от греха моего очисти мя.
Яко беззаконие мое аз знаю, и грех мой предо мною есть выну.
Тебе единому согреших, и лукавое пред Тобою сотворих.
Яко да оправдишися во словесех Твоих, и победиши внегда судити Ти.
Се бо, в беззакониих зачат есмь, и во гресех роди мя мати моя.
Се бо, истину возлюбил еси, безвестная и тайная премудрости Твоея явил
ми еси.
Окропиши мя иссопом, и очищуся; омыеши мя, и паче снега убелюся.
Слуху моему даси радость и веселие; возрадуются кости смиренныя.
Отврати лице Твое от грех моих и вся беззакония моя очисти.
Сердце чисто созижди во мне, Боже, и дух прав обнови во утробе моей.
Не отвержи мене от лица Твоего, и Духа Твоего Святаго не отыми от
мене.
Воздаждь ми радость спасения Твоего, и Духом Владычним утверди мя.
Научу беззаконныя путем Твоим, и нечестивии к Тебе обратятся.
Избави мя от кровей, Боже, Боже спасения моего; возрадуется язык мой
правде Твоей.
Господи, устне мои отверзеши, и уста моя возвестят хвалу Твою.
Яко аще бы восхотел еси жертвы, дал бых убо: всесожжения не
благоволиши.
Жертва Богу дух сокрушен; сердце сокрушенно и смиренно Бог не
уничижит.
Ублажи, Господи, благоволением Твоим Сиона, и да созиждутся стены
Иерусалимския.
Тогда благоволиши жертву правды, возношение и всесожегаемая; тогда
возложат на олтарь Твой тельцы.
Канон, глас 8, егоже краегранесие: Возвесели нас, отче, твоею славою.
Герасимово.
Песнь 1
Ирмос: Воду прошед, яко сушу,/ и египетскаго зла избежав,/
израильтянин вопияше:/ Избавителю и Богу нашему поим.
От земли явишася, якоже крини весеннии,/ честныя мощи твоя, отче
Ефреме,/ благоуханием небесным зловоние страстей отгоняющия.
Свыше назирая обитель твою и чтущия тя благочестно,/ даждь всем,
Ефреме всеблаженне,/ благословение твое и благодать изобильную.
Светом святых твоих молитв/ мглу страстей и нощь искушений отжени,
отче,/ от всех, верою прибегающих к священным мощем твоим.
Богородичен: Разреши мя всякаго ухищрения врага бесплотнаго/ и укрепи
предстательством Твоим честным, едина Богородице,/ да пою Твою славу
неизреченную.
Песнь 3
Ирмос: Небеснаго круга Верхотворче Господи,/ и Церкве Зиждителю,/
Ты мене утверди в любви Твоей,/ желаний краю, верных утверждение,/ едине
Человеколюбче.
Восшед, яко звезда всесветлая,/ явлением честных мощей твоих, святе,/
блистаньми световодиши сердца просящих твоея помощи.
Недугов всяческих и скорбей тяжких огнь,/ росою честных молитв твоих
угашаеши./ Сего ради вопием ти:/ угаси наша страсти, святе,/ дождем
Божественнаго Духа.
К священному гробу твоему со усердием притекающии/ исцеление
приемлют, отче, и избавление от всяких зол./ Ты бо, яко благосердый, всем
подаеши благодать и милость.
Богородичен: Умный Престол и златозарный Чертог Всецаря славы и
Вседержителя/ зрим Тя, Дево Чистая./ Темже и нас делы благими соделай
жилище божественныя благодати.
Катавасия:
Сохрани
приходящих
к
божественному
твоему
предстательству/ от всякаго вреда и болезней и скорбей,/ преподобномучениче
Господень Ефреме богомудре.
Призри благосердием:
Седален, глас 2.
Подобен: Вышних ища:
Предстатель теплый ныне показался еси, богоблаженне Ефреме,/
явлением священных мощей твоих,/ нам, любовию прибегающим к ходатайству
твоему./ Сего ради вопием ти верно:/ Христу о всех, отче, молися.
Песнь 4
Ирмос: Услышах, Господи,/ смотрения Твоего таинство,/ разумех дела
Твоя/ и прославих Твое Божество.
Многообразне являешися призывающим священное имя твое/ и
исполняеши прошения, яже ко спасению,/ Ефреме преподобне.
Болящим исцеление и скорбящим радость преизобильную подаждь
свыше,/ святе Ефреме, прибегающим к покрову твоему.
Обитель твою невредиму от нахождений вражиих соблюди, святе
Ефреме,/ благочестно чтущую святыя мощи твоя.
Богородичен: От утробы Твоея, Чистая,/ взыде Правды Солнце,/ Егоже
блистаньми омраченный мой ум просвети.
Песнь 5
Ирмос: Просвети нас повелении Твоими, Господи,/ и мышцею Твоею
высокою/ Твой мир подаждь нам,/ Человеколюбче.
Палицею крепкою молитвы твоея, святе Ефреме,/ отжени невидимаго
врага,/ аки льва, на нас рыкающаго.
Добре подвизался еси иногда, блаженне,/ в последняя же познался еси
явлением святых мощей твоих,/ освящая души наша.
Великий заступник обители явился еси, святе,/ обретшей, якоже
божественное сокровище,/ мироточивыя и святыя мощи твоя.
Богородичен:
Пресвятая
Чистая
Богородице
Приснодево,/
немощствующую грехми душу мою/ исцеления сподоби Твоею благодатию.
Песнь 6
Ирмос: Молитву пролию ко Господу,/ и Тому возвещу печали моя,/ яко зол
душа моя исполнися,/ и живот мой аду приближися,/ и молюся, яко Иона:/ от
тли, Боже, возведи мя.
От земных недр честныя твоя мощи многолетне сокровенныя,/ яви нам в
последния дни Духа Святаго благодать/ и показа тя, отче Ефреме, врача душ и
телес.
Укрепил еси расслабленнаго и здрава показал еси, отче,/ прибегшаго к
божественной раце твоей,/ и страхом Господним сего вразумил еси./ Темже
отыде в радости, величая чудодеяние твое.
Честней игумении Макарии яве предстал еси,/ подвиги и страдания твоя,
яже за Христа, открывая./ И нас, на лик твой с любовию взирающих,/ исполни
радости небесныя, Ефреме богоприятне.
Богородичен. Вместилище Вышняго и Храм Световидный явилася еси,
Дево,/ от чистых кровей Твоих рождшая мирови Сего, яко Человека, многия
ради Божественныя милости./ Темже поем славу Твою.
Кондак, глас 2:
Явлением честных мощей твоих/ всем показал еси твою светлость,/
исцелений бо нам источаеши струи/ и избавляеши от злых обстояний, отче
Ефреме,/ имя твое призывающих.
Стихира, глас 6:
Претерпел еси мужественне агарян нападение,/ и мученик непобедимый
Владыки Христа явился еси, святе Ефреме,/ и радость совершенную верным
подал еси/ обретением мощей твоих,/ имиже всякия наветы велиара
отгоняются,/ и недуги врачуются/ и душевныя раны исцеляются./ Сего ради
тебе вопием:/ не престани молити Христа Бога,/ даровати нам отпущение
грехов/ и жития исправление.
Песнь 7
Ирмос: От Иудеи дошедше отроцы/ в Вавилоне иногда верою Троическою
пламень пещный попраша, поюще:/ отцев Боже, благословен еси.
С Небесе, богомудре Ефреме, приходя к божественной обители твоей,/
являешися чудно различными видении/ и исполняеши прошения тя
воспевающих.
Дивно во сне и яве, блаженне Ефреме, являяся,/ радость, веселие и всякое
дарование благое подаеши,/ славящим святое житие твое.
Обитель твоя, Ефреме, яко святынею божественною и даром небесным,/
многоцелебными мощами твоими, обогатившися,/ освящает благодатию всех
верно приходящих.
Богородичен: Честными Твоими молитвами, Богоблагодатная,/ яко ниву
невещественно возделай душу мою,/ да плоды покаяния изращу и по кончине
вышния жизни сподоблюся.
Песнь 8
Ирмос: Царя Небеснаго,/ Егоже поют вои ангельстии,/ хвалите и
превозносите во вся веки.
Возвесели, отче Ефреме,/ радостотворною помощию твоею стенающия в
скорбех и нуждах,/ избавляя их всякия горести.
Росою святых молитв твоих, богомудре,/ огнь недугующия души моея
угаси/ и прохладу божественную даруй.
Лику святых сочетався, богомудре отче,/ усердно с ними молися/ о
чтущих святую память твою.
Богородичен: Спаси мя, Отроковице, от вражескаго властительства/ и
омый ум мой оскверненный греховными помыслами и деяньми.
Песнь 9
Ирмос: Воистинну Богородицу/ Тя исповедуем,/ спасеннии Тобою, Дево
Чистая,/ с безплотными лики Тя величающе.
Исцели, преподобномучениче Господень, всеблаженне Ефреме,/ всяк
недуг приходящих ко святым мощем твоим.
Обитель твою святую сохраняй неусыпно/ благодатным водительством
твоим, преподобне отче,/ от козней велиара и всякия скорби.
Новоявленный во святых показался еси, чудоносче Ефреме дивне,/ избави
нас безумия вражия.
Богородичен: Ум мой, Богородице, яви превыше скверных помыслов
лукаваго/ и сердце исполни божественнаго блистания.
----------------------------------------------------------------------------------------------В данном переводе сделана попытка точнее следовать греческому оригинальному
тексту. Однако греческая гимнография отличается от церковнославянской, потому был
предпринят ряд отступлений:
1. Сокращено количество личных и притяжательных местоимений, свойственных
грамматике греческого языка.
2. Уменьшено количество обращений (в греческой традиции принято использовать их
избыточное количество) с 2-3 до 1.
3. Часто употребляемое слово «божественный» заменено на «священный»,
«честный» или другие, в соответствии с контекстом.
4. Упоминание «о поклоняющихся мощем» в некоторых случаях заменено на «о
почитающих святую память твою».
5. Моление об обители в некоторых случаях заменено на моление о верующих.